World

പെട്രോൾ വില ഇനിയും ഉയരുന്ന സാഹചര്യത്തിൽ രൂപയുടെ മൂല്യതകർച്ച തുടരുമെന്ന്​ സാമ്പത്തിക വിദഗ്​ധർ

പെട്രോൾ വില ഇനിയും ഉയരുന്ന സാഹചര്യത്തിൽ രൂപയുടെ മൂല്യതകർച്ച തുടരുമെന്ന്​ സാമ്പത്തിക വിദഗ്​ധർ. അടുത്ത മാസം ഇറാനു മേൽ യു.എസ്​ എണ്ണ ഉപരോധം നടപ്പാകുന്നതോടെ രൂപയുടെ മൂല്യം വീണ്ടും കൂപ്പുകുത്തും. ​പ്രവാസികൾക്ക്​ ഇത്​ കൂടുതൽ ആശ്വാസം പകരും.

ദിർഹമിന്​ ഇരുപത്​ രൂപ 10 പൈസ എന്ന നിലയിലായിരുന്നു യു.എ.ഇയിലെ വിനിമയം. മറ്റ്​ ഗൾഫ്​ കറൻസികൾക്കും ചരിത്രത്തിൽ ഇതു വരെ ലഭിക്കാത്ത ഉയർന്ന വിനിമയ മൂല്യമാണ്​ പ്രവാസികൾക്ക്​ ലഭിക്കുന്നത്​.

മാസാദ്യത്തിൽ പ്രവാസികൾക്കു വേതനം ലഭിക്കുന്ന സമയമായതിനാൽ വിനിമയ നിരക്കിലെ വർധന പ്രവാസികൾക്ക് ഏറെ ഉപകാരപ്പെടുന്നുണ്ട്​. മണി എക്സ്ചേഞ്ചുകളിൽ നല്ല തിരക്കാണ്​ തുടരുന്നതും. ഓൺലൈൻ ബാങ്കിങ് മുഖനയും ധാരാളം പേർ പണമയക്കുന്നുണ്ട്​. ഇറാൻ ഉപരോധം കൂടിയാകുന്നതോടെ ദിർഹത്തിന്​ 21 രൂപക്കു മേൽ മൂല്യം ഇടിയുമെന്നാണ്​ റിപ്പോർട്ട്​.

വിനിമയ നിരക്ക് പ്രയോജനപ്പെടുത്താനായി ഗൾഫിലെ ബാങ്കുകളിൽ നിന്നും മറ്റും വായ്പയെടുത്തു നാട്ടിൽ നിക്ഷേപം നടത്തുന്നതു ശരിയല്ലെന്നാണ്​ സാമ്പത്തിക വിദഗ്​ധർ വ്യക്​തമാക്കുന്നത്​. വിനിമയ നിരക്കിന്റെ മെച്ചം പ്രവാസികൾക്കു തൽക്കാലം ഗുണകരമാണ്​. എന്നാൽ നാട്ടിൽ വിലക്കയറ്റത്തിനു വഴിയൊരുക്കും എന്നതിനാൽ ദീർഘകാലാടിസ്ഥാനത്തിൽ അതു മെച്ചം ചെയ്യാനിടയില്ല.